خالد المصري

Sunday, July 20, 2008

ما بين الحاله والاستحاله

الفرح حاله
والحزن حاله
والحب حاله
والسعاده حاله
والملل حاله
و...و..و...و.و حاله

طب لو فقدنا الحاله دي هل ممكن نبني حياتنا على استحاله عودتها
طب ولو رجعت
طب ولو مرجعتش

حيرة
والحيرة حاله

Tuesday, June 24, 2008

النهارده الصبح كنت بستمتع بمدونه العزيز سوووووو عجوز وعندي 30 سنة واذ فجأة عنيا تقرا اسم المدونة
عجوز وعندي اسئلة

يا ترى انهي اصعب
ان الشاب يعجز وهو في ال 30
ولا انا انه يعيش عمره لحد ما يعجز وتفضل جوانا الاسئله
كارثه بجد يا ولاد
كارثه لو عشنا عمرنا كلها من غير ما نلاقي اجوبه
كارثه لو كل مساهمتنا في الحياه هيا في طرح مزيد من الاسئله بدون ايجاد اجوبه للبعض على الاقل
ده مش تقليل من قيمه الاسئله
ومش اسقاط على اسئله الثانوية العامه اللي ملهاش اجوبه

لكنه سؤال جديد لا اجد له جواب

Monday, June 23, 2008

الرجل صنيعة الشدائد......والمرأه صنيعة المكائد

اصبري انتي وهيا
اقري اللي هيكتب الاول وبعدين ابقي قولي اللي انتي عايزة

الرجل صنيعه الشدائد
واشد ما يواجه الرجل في حياته هيا المرأه
مخلوق يصعب فهمة والتعامل معه
ويجب ان ترضيه

يا سلااااااااااااام

يعني لا مؤخذه واحده مش عارفه هي عايزة ايه والمطلوب مني انا اني اعرف هيا عايزة ايه واحققهلها والا ابقى مقصر
يا حلاوة يا ولاد

طب والعمل
بسيطة
شويه حيله
شويه دهاء
شويه لف ودوران

والهوبا يا ولاد
الزبون اتظبط وبقى اخر انبساط

بس في خسائر بسيطة
وانا وسط كل ده
وبلف وبدور وبعمل فهلوي
تعلمت هي مني الحيله
وبما ان المرأه تعشق التطوير
تطور حيل الرجل البسيطة لمكائد عظيمة
تصنع منها امرأه لا تقهر
امرأه من المكائد
...............

دمتم بود

السؤال ؟؟؟

سلام
حبيت اقول للي حابب يسمع واللي يهمه يعرف انا اختفيت ليه

اختفيت عشان سببين بنتشارك فيهم انا وكتير منكم بس لازم اقولهم :

1- البحث عن لقمه العيش( مطحون شغل )
2- اختفيت لان الأسئله كترت جويا

كل يوم بيجي بسؤال جديد
وكل سؤال اصعب من الأسئله اللي قبله
وعيب الاسئله يا اخونا انها بتفتح عنينا
بتخلينا نشوف

هتقوليلي بس الشوف مش عيب

الشوف مش عيب اه
بس لما تبقى بتشوف سكه للاجابه
لكن لما اللي تشوفه يكون بيخلق جواك اسئله اكتر
سؤال ورا سؤال
وما من مجيب

لكن النهاردة بس افتكرت ليه انا بدائت اكتب اللي جوايا
عشان تسعدوني نلاقي اجابه
او على الاقل نلاقي سؤال سهل شويه

دمتم بود

Thursday, March 13, 2008

كلمات بعشقها

مات الكلام فوق الشفايف
و انتا شايف من سكات
مات و جفت دمعة رفت
فوق خدود الأمنيات
كنت بعشق فيك صديقي
كنت بلقي فيك طريقي
قولي مين هيبل ريقي
من العطش بعد السكات
ياللي صمتك صوت نداني
يا ابتسامة مودعاني
ده اللي باقي من المعاني
يا حبيبي يا دوب آهات

Tuesday, February 5, 2008

حمص وحلاوة و عبير سليمان

يا ليتني ما قرئت عبير سليمان وهيا تتحدث على أغنيه الختام لفيلم سمع هس (حمص وحلاوة) (هتشوفوا طريقنا مودى لفين ... على ما تهل سنة ألفين...هنكون...فوق...فوق...فوق...و أطول واحد فيكوا هايجى تحت كتافنا ... كده بشبرين ) هيا السبب سامحها الله
ذكرتني بالكثير

مثلا
بجهودنا يا ناس هتكون احلى والخير هيعم على ولادنا (ولاد من المقصودين؟؟؟؟؟؟ )

لا اعلم لماذا دون عن كافه الأغاني الوطنية بكل كلماتها هذه الكلمات تثير بداخلي حاله من الضحك الأسود
أغاني
كلمات
أفلام
عروض لا حصر لها
كتب قراءه في المدارس
ملف المستقبل ( نور الدين وسلوى ومحمود ورمزي )
كل شيء من حولنا ونحن صغار دائما ما حدثنا ووعدنا بمستقبل باهر مستقبل مليء بالحلول والرفاهية فالعالم سنه إلفين سيكون مختلفا والطعام سيكون في صوره كبسولات تحمل كل فوائد الطعام والحياة الصحية و أحلام وطموحات ودنيا مليئة بالورود يختفي فيها ثقب الأوزون وتحل كل مشاكل البيئة ونسافر لتقضيه إجازة الصيف بشواطئ المشتري أو نخرج في رحلات صيد بالمريخ و...و...و...و...و...و...و...و...و...و

و(يا لهوي)

صدقا لا أجد ما اعبر به غير (يا لهوي ) المستقبل جاء باسئله اشد وطأة من اسئله الماضي والطعام لم يعد متوفر لا في كبسولات ولا غيرها والبيئة أصبحت شتيمه وشواطئ المشترى اشتراها صاحب الفانوس السحري كما اشترى كل شواطئ المحروسة ورحلات الصيد اليومية نصطاد فيها لقمه ملوثه بالسحابة السوداء نبتت من بذره أصابها الإشعاع ليقف عليها طير الأنفلونزا هذا أو نصبح نحن الفريسة لمن لا يرحم

لكن على الرغم من ذلك ومن كل شيء

لو بطلنا نحلم نموت

Wednesday, January 30, 2008

تيييييييييييييييييييييييت ... تم حذف العنوان من قبل الرقيب

اولا بطلب منكم تسمحوني انا هحاول اكون مؤدب بقدر المستطاع وان كان صعب بس هحاول

ايه الموضوع بقى ؟

بدون مقدمات ده العنوان اللي قريته في موقع جريدة المصري اليوم :

طبيب في «معهد التدريب» يتقاضي ٢٢ ألف جنيه.. مقابل محاضرتين في الأسبوع لمدة ٣ أشهر!

اولا اثتان وعشرون الف تيتتتتتتت وشويه فكه عشان خاطر الحبايب

ثمانين مليون تيييييييييييت بعدد سكان مصر الغلابه اللي المبلغ ده بالنسبه لكتير فيهم حلم ممكن يفتح بيه باب رزق يعيش منه

ثلاثه ونص مليون تيييييييت بعدد المصريين اللي طلعان عنيهم في الغربه واللي الغالبيه العظمى منهم مبتحصلش نص المبلغ ده

مائه وثمانون الف تيييييييييت بعدد اطباء مصر اللي بيقبضوا 120 جنيه في الشهر

وتيت تيت تيت تيت تيت تيت

نيجي بقلى للباشا ابو 22 الف بيعمل ايه في مقابل الفلوس دي

مش يمكن يا جماعه الراجل ده بيقدم خدمه عظيمه وعنده علم نادر الوجود وبيدرب علماء ذره ولا خبراء اقتصاد ولا حتى خبراء سباكه هيقدر يحلوا مشكله المياه في بلد النيل

الغريبه ان الاستاذ الدكتور الجهبذ بيقدم تدريب اعتيادي للمسعفين في المعهد القومي للتدريب، التابع لوزارة الصحة،

وربنا لا يكتب على حد منكم ويتعامل مع هؤلاء المسعفين العباقره اللي تدريبهم بيتكلف كل ده

نتوغل شويه في الخبر نلاقي ان الباشا ده مش لوحده كده ده في عشرين استاذ اخر بس للانصاف الخبر ذكر انهم اقل منه شويه

ده غير السيد مستشار وزير الصحه اللي بيقبضوه 38 الف وشويه فكه

المشكله الكبيره والتيت الكبيره في الموضوع ان المصري اليوم مشكوره لم تدع لي فرصه ان اظن ان المعهد من الجهات ذات الثراء الفاحش فالمعهد المحترم قد قررالاتي بدايه عام 2008

تقديم ساندويتش وكوب شاي فقط لكل متدرب، بدلاً من ٢ ساندويتش و٢ قطعة جاتوه وكوب شاي، وذلك لضغط المصروفات وعدم وجود موارد مالية في المعهد.

بصراحه مش قادر اسكت اكتر من كده

حمرا

( الكتابه اوعوا تفهموني غلط )